जाहले भजन आम्ही नमितो तव चरण।
वारुनिया विघ्ने देवा रक्षावे दीना ॥धृ॥
दास तुझे आम्ही देवा तुजलाची ध्यातो।
प्रेमे करुनिया देवा गुण तुझेची गातो ॥१॥
तरी द्यावी सिद्धी देवा हेची वासना।
रक्षुनियां सर्वां द्यावी आम्हासी आज्ञा ॥२॥
मागणे ते देवा एकची आहे आता।
तारुनियां सकळां आम्हां कृपादृष्टी पाहे ॥३॥
जेव्हां सर्व आम्ही मिळू ऐशा या ठाया।
प्रेमानंदे लागू तुझी कीर्ति गावया ॥४॥
सदा ऐशी भक्ति राहो आमुच्या मनी।
हेची देवा तुम्हा असे नित्य विनवणी ॥५॥
वारुनिया संकटे आता आमुची सारी।
कृपेची साऊली देवा दीनावरी करी ॥६॥
निरंतर आमुची चिंता तुम्हां असावी।
आम्हां सर्वांची लज्जा देवा तुम्ही रक्षावी ॥७॥
निरोप घेता आता आम्हा आज्ञा असावी।
चुकले आमचे काही त्याची क्षमा असावी ॥८॥